Masu kutsen komfutoci sun nemi kudin fansa

Wasu gungun mashahuran da ake zargi da badakalar kusten komfutocin a kasashen duniya, sun bukaci a biya su dala miliyan saba'in a matsayin kudin fansa kafin su saki shafukan da sauran bayanan da suka kwace. 

Mutanen da ake zargi da laifuka na kustawa cikin rumbunan bayanan sirrin kamfanoni a sassan duniyan, sun shigar da wannan bukatar ta hanyar wallafa sakon ne a shafinsu, wanda tuni masu aikin binciken lamarin, suka tabbatar da sahihancinsa.

Al'amura sun tsaya cik, inda kamfanoni da dama suka gagara yin mu'amala ta kudi yayin da wasu suka koma amfani da tsohuwar hanyar fax da wayar tarho, Amirka da kasashen Turai lamarin ya fi shafa.