Буш го именуваше спорниот Болтон за американски амбасадор во ОН

Џорџ Буш го презентираше Џон Болтон како свој посакуван кандидат за амабсадор во ОН уште во март годинава, откако еден месец претходно од тоа место си замина претходниот амбасадор, поради лични причини. Но, Сенатот го блокираше именувањето на Болтон и местото на САД во Њујорк оттогаш е празно:

“Америка повеќе од шест месеци е без постојан амбасадор во ОН: Оваа функција е премногу важна за да може и натаму да биде игнорирана, особено во времиња на војна и енормно важна реформа на ОН:“

Затоа Буш ја искористи привилегијата од уставот, врз основа на која претседателот на земјата има право да именува важни функционери, ако, како што тоа сега е случај, Сенатот е на одмор. Претседателот му изрази целосна доверба на Болтон – тој е вистинскиот човек за спроведување на неопходните реформи во ОН. За опозицијата,пак, Болтон е човек што политички е начнат и поради неговите критички изјави за ОН во минатото, тој е оптоварување во односите на Америка и светската организација. Болтон, непосредно по именувањето од страна на Буш, рече:

“Сакаме посилни и поефективни ОН, кои ќе се држат до идеалите на основачите на организацијата и ќе бидат доволно агилни за да можат да работат како што треба и во 21 век. Привилегија е да се дејствува како адвокат на американските вредности и интереси во ОН.“