2024: 82 милиони луѓе повеќе во светот

На преминот од 2024 во 2025 година, се проценува дека на Земјата живеат 8,156 милијарди луѓе. Тоа е околу 82 милиони луѓе повеќе од пред точно една година (8,083 милијарди), објави Германската фондација за светско население (ДСВ). За споредба - сличен број луѓе во моментов живеат во Германија, односно околу 84 милиони луѓе. Бројката од 8 милијарди луѓе ширум светот беше надмината во ноември 2022 година. Обединетите нации (ОН) очекуваат дека границата од 9 милијарди може да биде надмината во 2037 година. ОН проценуваат дека оваа бројка ќе достигне 10 милијарди во втората половина на векот.

Растот на населението забавува

Според ДСВ, апсолутниот број на луѓе постојано расте, но овој раст се случува со побавно темпо. Во моментов, жените ширум светот имаат во просек по 2,2 деца. Според ДСВ, населението особено силно расте во Африка: населението таму се очекува да се зголеми повеќе од двојно во следните две децении. Се очекува дека до крајот на векот населението во Африка ќе порасне од 1,2 милијарди, денес, на 3,4 милијарди луѓе.

Жените играат клучна улога

Фондацијата претпоставува дека светската популација ќе достигне максимум од околу 10 милијарди луѓе до средината на 2080-тите години. „Потоа, според прогнозите, намалувањето на бројот на раѓања плус сѐ поголемиот број на смртни случаи ќе обезбеди светската популација не само да старее, туку и да почне да се намалува“, се вели во извештајот на ДСБ.

Жените имаат клучна улога во бројот на породувања. Тие треба самите да можат да решаваат за сопствените животи и за планирањето на семејство. Образованието и сексуалното образование се од суштинско значење за девојчињата и за младите жени да можат да одлучат „кога и со кого колку деца да имаат“. „Ако жените имаат еднакви права, пристап до образование и здравствена заштита, економска независност и сопствена политичка волја, тогаш семејствата автоматски ќе станат помали“, објаснува генералниот директор на ДСВ, Јан Кројцберг.