60 години ОН

„Песната на мирот„ исполнета од хорот на Обединетите нации беше повод за генералниот секретар Кофи Анан токму на 60-годишнината од официјалното формирање на светската организација да упати повик погледот да се упати напред кон претстојните реформи:

„Во сите подрачја мораме да тргнеме напред: во развојот, безбедноста и човековите права. Никогаш порано во историјата на Обединетите нации не беа потребни толку смели решенија„.

Истовремено тој укажа на успесите на организацијата во минатото, пред се за мирот:

„Се обидовме да спречиме војни, да ги решиме конфликтите и да воспоставиме мир. Ги озаконивме човековите права и направивме се што е можно за човековото достоинство„.

Меѓутоа, Анан мораше да ги признае и пропусти:

„Имаме многу заслуги за мирот. Но исто така направивме и грешки. Најтешката беше веројатно нашиот колективен пропуст во спречувањето на геноцидот во Руанда„.

За поука од грешките и поставувањето на Обедиентите нации кон совремието, потребни се сеопфатни реформи за кои со месеци се дебатира. Големиот јубилеен самит во септември, вели Анан, е можност што се појавува само еднаш во рамките на една генерација:

„Во септември претседателите на држави и влади се повикани да ги донесат овие важни решенија. Да работиме заедно и да се погрижиме оваа единствена шанса да не биде пропуштена„, повика генералниот секретар.