Трамп сака укинување на пресудата за прикривање на поткуп

Како што претходно се навестуваше, адвокатите на новоизбраниот  претседател на САД, Доналд Трамп го користат помилувањето од страна на претседателот во заминување Џозеф Бајден за неговиот син Хантер за да тврдат дека треба да биде отфрлена обвинителната пресуда против Трамп пред судот во Менхетен во случајот со тајните исплати на пари за молчење на порно актерката Сторми Даниелс.

Адвокатите на Трамп во судската претставка поднесена во понеделникот рекоа дека Бајден во текстот на помилувањето на Хантер навел дека неговиот син бил „неправедно гонет“ и „поинаку третиран“ пред судот само затоа што е негов син.

Адвокатите Тод Бланш и Емил Боув, кои Трамп ги избра за највисоки позиции во Министерството за правда во неговата нова администрација, тврдат дека Бајден со тие коментари го осудил Министерството за правда, наведувајќи дека окружниот обвинител на Њујорк, Алвин Брег, учествувал во истиот вид „политички театар. "

Канцеларијата на Брег го обвини Трамп за фалсификување деловни документи во врска со исплата на поткуп од 130.000 долари на Сторми Даниелс во 2016 година пред претседателските избори во замена за нејзиното молчење за нивната наводна сексуална врска.

Судијата Хуан Мерчан на неодредено време го одложи изрекувањето на казната за Трамп, по обвинителната пресуда на поротата, откако тој беше реизбран за претседател.

Адвокатите на Трамп, исто така, сакаат да се отфрли пресудата, но канцеларијата на обвинителот соопшти дека ќе се спротивстави на секој обид да се отфрли случајот.