Израел првпат призна дека го ликвидирал Исмаил Ханија
24 декември 2024
Израел ја презеде одговорноста за убиството на лидерот на Хамас Исмаил Ханија во Техеран. Министерот за одбрана, Израел Кац, во понеделникот (23.12.2024) призна дека Израел го ликвидирал Ханија во Техеран претходно годинава, предупредувајќи дека војската ќе го „обезглави“ раководството на јеменските бунтовници Хути, исто така, поврзани со Иран.
Израел досега не призна дека го убил Ханија, иако Иран го обвини за убиството на политичкиот лидер на палестинското движење Хамас, кое САД и ЕУ го сметаат за терористичка организација.
„Ќе ги удриме силно Хутите... и ќе го обезглавиме нивното раководство - исто како што направивме со Ханија, (Јахја) Синвар и (Хасан) Насралах во Техеран, Газа и во Либан, ќе го направиме тоа и во Ходеида и во Сана“ рече Кац.
Јеменските Хути поддржани од Иран напаѓаат комерцијални бродови во Црвеното Море повеќе од една година во обид да спроведат поморска блокада на Израел, велејќи дека тие дејствуваат во знак на солидарност со Палестинците во Појасот Газа.
Кац додаде дека „на секој кој ќе крене рака на Израел ќе му биде отсечена раката, а долгата рака на ИДФ (израелската армија) ќе го удри и ќе го повика на одговорност“, соопшти израелското Министерство за одбрана.
Ханија, за кој се веруваше дека преговарал за прекин на огнот во Појасот Газа во име на Хамас, беше убиен на 31 јули во пансион во Техеран, наводно со импровизирана експлозивна направа поставена од израелски оперативци неколку недели претходно.
Еден ден претходно, Ханија присуствуваше на инаугурацијата на иранскиот претседател Масуд Пезешкијан.
Израел го уби лидерот на Хезболах Хасан Насралах во бомбашкиот напад во Бејрут на 27 септември, по што следеше убиството на наследникот на Ханија, Јахја Синвар, на 16 октомври во Појасот Газа.
Израелските власти велат дека Синвар го организирал нападот на Хамас врз Израел на 7 октомври 2023 година, кој ја предизвика војната во Појасот Газа.