شیرین نوبهاري: په قوت سره د عکس العملونو په وړاندې مبارزه

۳۰ کلنه شیرین نوبهاري په تهران کی د یوه سپورتي کلپ د رنگه دیوال مخې ته ولاړه ده. د رسنیو په حواله هغې په ۱۴ کلنۍ کې لا د ښځو د بدني ښکلا سره خپله علاقه ښودلې وه. که څه هم دغه ډول سپورت په هغه وخت کی د هغې په ټاټوبي ایران کې په رسمي توگه نه وو پیژندل سوی. شیرین نوبهاري د ویډیو او مجلو له لارې په تمرین کولو پیل وکړ.

د رسنیو په قول، شیرین نوبهاري، د دغه هیواد د ځواکمنو ښځو په ډله کې ده او د لومړۍ باډي بیلډرې په توگه په رسميت پیژندل سوې ده. دا د عضلاتو د قوي کیدو په اړه خپله پوهه نورو ته هم انتقالوي او په اصطلاح دغه غیرعادي سپورت ته نورې ورزشکارانې هم هڅوي.

نه یوازې د شیرین نوبهاري له پاره په اول سر کې دا کار ستونزمن وو. د ایران د سپورت یوه مجله لیکي چې په اول سر کی ښځو ته اصلاً اجازه نه ورکول کیده چې په یوه سپورتی کلب کې تمرین وکړي. د ۲۰۰۰ کال په پیل کې ښځینه ورزشکارانې مجبوره وې چې په پټه د خپلو عضلاتو د قوي کولو له پاره تمرين وکړي. زیاتره وخت پرته له ترینرانو څخه.

څو کاله مخکې د ایران کلبونو خپلې کوټې د ښځو پر مخ هم پرانیستلې وې. خو بیا هم یو عادی تمرین به زیاتره وخت امکان نه درلود. ښځینه ورزشکارانو به یوازې هغه وخت د تمرین کولو اجازه لرله چې نارینه نندارچيان به هلته نه وو حاضر. هغوی به یا سهار وختي تللې او یا هم د غرمې د سختې گرمۍ پر وخت.

سربیره پر دې به شیرین نوبهاري خپلو تمریناتو ته ادامه ورکوله. نه یوازې تمرین کول د هغې له پاره ستونزمن وو بلکه پر انستاگرام باندې به هم د هغې په عکسونو ریشخند وهل کیده. د رسنیو په حواله د هغې پر اکاونت به په میاشتو میاشتو بندیز لگول سوی وو.

داسې ښکاري چې په عادي کالیو کې شیرین نوبهاري له پامه غورځول سوې وي او په سپورتی کالیو کې هم دغه ۳۰ کلنه د خپلو عکسونو له امله له سختو ستونزو سره مخامخ کیږي خو بیا هم ښه ده چې د نورو ښځینه ورزشکارانو په څیر، د بندی گرت له سزا سره نه ده مخامخ. د "Women in the World" په نامه آنلاین مجلې په حواله هغه غواړي په ایران کی پاته سي. هغه هیله لري چې پرته له محدودیتو د سپورت په برخه کې خپلو هیلو ته ورسیږي.