په ډهلي کې اوس هم ځيني کسان ډاريږي

د اړودوړ د قربانیانو له پاره په عیدګاه کې چارواکو یو مؤقتي کمپ جوړ کړی دی. دغه یو ستر پرانیستی مسجد دی چې د اختر د لمونځونو له پاره جوړ شوی دی. دغه ځای اوس تر۱۰۰۰ زیاتو کسانو له پاره چې تاوتریخوالي اغیزمن کړي، یوه سرپناه ده. دغه ځای د هند په پلازمېنه مصطفی آباد کې موقعیت لري.

د دې تصور ګران دی چې د کمپونو میشت کسان دغه پيښې هیرې کړي. هغوی په ویره او درد کې ژوند کوي او هک پک دي چې خپل ژوند به څرنګه بیرته جوړوي. د دغه مذهبي تاوتریخوالي سبب د هند د تابعیت نوی قانون وو چې د انتقاد کوونکو په وینا د هند مسلمان لږکي څنډه ته کوي. د پولیسو معلومات ښيې چې په دغه تاوتریخوالي کې ۵۳ کسان وژل شوي چې زیاتره یې مسلمانان دي او پر دې سربیره تر ۲۰۰ زیات کسان ټپیان شوي هم دي.

د عیدګاه کمپ پر دوو برخو ویشل شوی دی، په یوه برخه کې یې ښځې او په بل کې نارینه اوسیږي. دغه ځایي بلوا د دهلي اوسیدونکي په شوک کې اچولي او ډیرې یې په دې آند دي چې هیڅکله یې په خپل دغه پلرني ټاټوبي کې د دغه ډول تاوتریخوالي اټکل نه کاوه.

هغه ماشومان چې تاوتریخوالی یې لیدلی دی، په ډار کې دي. د اړودوړ په ترڅ کې ډیر ښوونځي وسوځول شول. په دغه کمپ کې ځینو ماشومانو خپلو زده کړو ته ادامه ورکړې.

چارواکي او غیر دولتي سازمانونه په کمپ کې اوسیدونکو کسانو ته ډیر شمیر قانوني او روغتیایي خدمات وړاندې کوي. ډاکټران او نرسان د کمپ د اوسیدونکو پر عمومي معاینې سربیره هغوی ته دارو درمل هم ورکوي او پر دې سربیره د هغوی قانوني مرسته هم کیږي چې قربانیان د چور، اور اچونې او تاوتریخوالي پر ضد عریضې ثبت کړي.

پر کړاو، فزیکي تکلیفونو او ذهني صدمې سربیره هم د کمپ اوسیدونکي د ښو ورځو په هیله دي. هغوی هیله من دي چې یو ځل بیا به خپلو پخوانیو سیمو ته ولاړ شي او د خپلوانو او دوستانو سره به په خوشالۍ ورځې بیرته پیل کړي.