آیا د استراليايي عسکر او افغان ماشوم جنجالي انځور جعلي دی؟
۱۳۹۹ آذر ۱۶, یکشنبه
په ديجتلي بڼه بدل شوي دغه انځور کې يو استراليايي عسکر په داسې حال کې لیدل کيږي چې د يوه افغان ماشوم پر غاړه يې په وينو ککړه چاړه ايښې ده. دغه انځور د چين د بهرنيو چارو وزارت وياند، زاهو لیجيان، د دوشنبې په ورځ پر ټويټر خپور کړی وو. ياد انځور چې پر ټولنيزو رسنيو ډير خپور او د استرالیا غبرګون يې هم له ځانه سره لرلی، اوس ويل شوي چې نيمه جعلی دي.
د دغه انځور خپرول د کنبيرا (د استرالیا پلازمينه) غوسه راوپاروله او له ټويټر څخه يې د انځور د حذفولو غوښتنه وکړه، خو ټويټر رد کړه.
په کنبيرا کې د چين سفير د جمعې په ورځ ABC تلويزيون ته وويل چې له افغانستان څخه د استرالیا د لومړي وزير، سکات موريسون له خوا د بخښنې غوښتنه، په افغانستان کې د استراليايي ځواکونو جنګي جنایاتو په اړه تحقیقاتو ته لا توجه ډيره کړې ده.
خو د سایبرا په نوم یوه اسرائيلي سايبري امنيتي شرکت ويلي دی چې دا په ډیر لوړ احتمال سره د زوها ټويټ له پاره یو تنظيم شوي کمپاين وو.
سايبرا ويلي دي چې د دوی معلومات ښيي چې د زوها له ټويټ سره تماس درلودنکي ۵۷ اعشاريه ۵ سلنه اکاونټونه جعلي دي او «دا د غلطو معلوماتو د خپرولو په موخه د يوه پراخ کمپاين شواهد» دي کوم چې موخه يې د پيغام تقویت کول دی.
خو دا چې د دغه کمپاین تر شا د چا لاس دی، سايبرا يې په اړه جزئيات نه دي ورکړي.
د اسرائيلو دغه سايبري امنيتي شرکت زياته کړې چې دوی ۱۳۴۴ داسې پروفايلونه موندلي چې ډيره برخه ېې په نومبر مياشت کې جوړ شوي او يو ځل کارول شوي تر څو د زوها ټويټ بیا ځلي خپور کړي.
خو چين بيا د سايبرا دغه ادعاوې «بې بنسټه» بللي دي. د چين د بهرنيو چارو وزارت د جمعې په ورځ په دې اړه د رويټرز د يوې پوښتنې په ځواب کې وويل: «دا د غلطو معلوماتو د خپرولو يوه زړه بیلګه ده. ټويټر، د ټويټونو د مديريت خپله پاليسي لري.»
د ټويټر يوې وياندې ويلي دي چې دوی په خپل محتاط حالت کې پاتې کيږي، خو زياتوي چې د سايبرا شرکت موندنې کره نه دي، ځکه هغوی يوازې پر عامه معلوماتو باندې متکي دي يا په اختیار کې لري.