د زړو شیانو له بازاره اخیستل سوي کاسې د هغې رانیونکی شتمن کړ
۱۳۹۹ اسفند ۲۸, پنجشنبه
اعلان
د دغي چیني سپیني کاسې شین رنګه نقش او نګار، کومه چي د زړو شیانو په بازار کي رانیول سوې وه، په اول سر کي ډیر واضح نه معلومیږي. خو د ساتبیز د لیلام خانې کارپوهانو ارزیابۍ ښوولې ده، چي دغه کاسه ډیره نادره او د ۱۴ او ۱۷ مو پيړیو ترمنځ د مینګ چین امپراطورۍ په عصر پوري مربوط ده.
ددغو کارپوهانو په خبره په ټوله دنیا کي فقط شپږ دغه ډول کاسې پيژندل سوي دي، چي اکثره یې د جهان په مشهورو موزیمو، له هغې جملې څخه د بریتانيا په موزیم کي ساتل سوي او خلګ یې لیدلای سي.
دغه کاسه پرون چهارشنبه (د مارچ میاشتي ۱۷) د نیویارک په یوه لیلام کي په ۷۲۱۸۰۰ امریکايي ډالره خرڅه سوه. لیلامي فروشانو د هغې قیمت مخکي ۵۰۰۰۰۰ ډالره تعیین کړی وو. د هغه د رانیونکي په باب معلومات نه دي ورکړل سوي.