د ښځو نړیواله ورځ: په آسیا کي په زرونو ښځي سړکونو ته راووتلې

د ښځو د نړیوالي ورځي په مناسبت په آسیا کي په زرو ښځي سړکونو ته راووتلې او له ډیره وخته راهیسي دوامداره مظاهرو کي یې خپل نقش برجسته کړ. د نوي ډهلي په شاوخوا ناحیو کي ښځي چي ساړۍ یې اغوستي وې، په ډله ایز ډول هغو مظاهرو ته ورننوتلې چي له میاشتو راهیسي ددغه هیواد د زراعتي ریفورمونو پرضد رواني دي.

په ګاونډي هیواد میانمار کي ښځو په غټ ښار یانګون کي یووار بیا د هغه پوځ په وړاندي مظاهرې وکړې چي له څه د پاسه یوې میاشتي راهیسي د کودتا له لاري قدرت ته رسیدلی دی.

په یانګون کي چیري چي تل د مظاهره کوونکو او امنیتي چارواکو ترمنځ اخ و ډبونه رامنځته کیږي، ځینو خپلي عنعنوي لمني (لونګ) د پاڅون په توګه ښورولې. یوې ۳۰ کلني مظاهره کوونکي وویل: «سیاسي پوښتني موږ ټولو ته متوجه دي. ښځو او نارینه وو ته. په دغو مظاهرو کي ښځي هم سړکونو ته راووتلې او د مظاهرو رهبري یې پر خپله غاړه واخیسته.»

په هندوستان کي په هغو مظاهرو کي چي له نووامبر مياشتي راهیسي د زراعتي ریفورمونو پرضد رواني دي، او د صدراعظم نریندا مودي د حکومت له پاره په یوه لوی چلنج اوښتي، ښځو پر خپل رول باندي ټینګار کاوه.

همدارنګه په محافظه کاره هیواد پاکستان کي هم ښځو له لاهور څخه تر بلوچستان ایالت پوري چي د افغانستان سرحد ته نیژدې پروت دی، مظاهرې ترسره کړې.

د فلیپین په پایتخت مانیلا کي هم په سونو ښځي راټولي سوي وې تر څو، یوه ورځ مخکي د ډیریو فعالانو د وژلو پرضد مظاهرې وکړي.