امریکا په منځني ختیځ کي خپل هوايي دفاعي ظرفیتونه راکموي
۱۴۰۰ خرداد ۲۹, شنبه
لکه څنګه چي د امریکا د دفاع وزارت پرون جمعه (د جون میاشتي ۱۸ مه) خبر ورکړ، د امریکا متحده ایالاتو د دفاع وزیر، لوید استین امر کړی دی، چي « سږکال دوبی دي د دغي سیمي څخه مشخصي قواوي او ظرفیتونه وایستل سي.»
د امریکا د دفاع د وزارت ویاندي، جسیکا میک نولتي وویل، دا تر ټولو دمخه د دافع هوا ظرفیتونه دي. هغې همدارنګه وویل، چي د هغو یوه برخه به د امریکا متحده ایالاتو ته انتقال سي، تر څو د بیرته ترمیمولو او معاینه کولو لازم کارونه یې وسي. پاته نور تجهیزات به نورو منطقو ته انتقال سي.
خو ویاندي دا نه وویل، چي ایا دغه تجهیزات به هم د بحر هند او اوقیانوس ارام ساحې ته انتقال سي، چیري چي امریکا غواړي د چین د په مخ پر ډیریدونکي نفوذ مخنیوی وکړي.
د «وال ستریت» مجلې تردې دمخه رپوت ورکړی ؤ، چي پنتاګون د جون میاشتي په سر کي په دې باندي شروع کړې ده، چي د عراق، کویټ، اردن او سعودي عربستان څخه خپل د دافع هوا اته سیسټمونه او هم د سعودي عربستان څخه د «تاد» په نامه د هوايي دفاع یو سیسټم وباسي.
د هر دغه سیسټم دپاره باید په محل کي په سلهاوو عسکر حضور ولري. د «وال ستریت» مجلې په حواله، دا نو پدې معنی، چي د دغو تجهیزاتو د ایستلو سره به د منطقې څخه په زرهاوو عسکر هم خارج سي.
خو د پنتاګون ویاندي بیا په عین حال کي اطمینان ورکړ، چي « د تهدیدونو متناسب به خپل نظامي حضور په منطقه کي وساتي.» او د دې بیره وجود نلري، چي دغه تغیرات به « زموږ د ملي امنیت پرعلاقه مندیو باندي منفي تأثیر وکړي.» په خبره یې سربیره پردې به «د امریکا متحده ایالات دا ډول انعطاف پذیره پاته سي، چي د ضرورت په وخت کي به ډیر ژر خپلی قواوي منځني ختیځ ته واستولای سي.»
د امریکا متحده ایالات په اوس وخت کي د افغانستان څخه هم خپلي ټولي قواوي راباسي او په عراق کي یې پروسږکال د خپلو قواوو ظرفیت ۲۵۰۰ عسکرو ته راکم کړ. دا هم پداسي حال کي ده، چي واشنګټن ایران ته اوس هم د یوه لوی خطر په سترګه ګوري. خو نوی جمهوررییس، جوبایدن ددې سره علاقه مندی لري، چي د تهران سره اټومي تړون بیرته احیأ سي.
آ./م.ق.ن./ا.ا.