د نړۍ مهم خبرونه په انځورونو کې

د امریکایي ځواکونو قوماندان جنرال کمپیل، وویل چې په کندز کې د بې سرحده ډاکټرانو پر روغتون باندې تر هوایی برید لږ مخکې افغان پوځیانو له امریکایانو څخه د هوایی ملاتړ غوښتنه کړې وه. دغه امریکایی چارواکي روښانه نه کړه چې ایا په همدې برید کې د بې سرحده ډاکترانو روغتون په نښه شوی وو او که نه. کمپیل وویل چې د افغان په سیمه کې هوایی برید ترسره شو چې په پایله کې یې ملکیانو ته مرگ ژوبله اوښتې.

د آلمان صدراعظمي هندوستان ته د خپل درې ورځني سفر پر مهال له دې هیواد سره د لا پراخې همکارۍ خبره کړې ده. میرکل به د دوشنبې په سهار په نوي دهلي کې د هندوستان له لومړي وزیر نریندرا مودي سره وویني. تمه کیږي چې د دواړو هیوادونو تر منځ د تجارت او پانګونې وده او د آزاد تجارت په برخه کې پرمختګ د میرکل د سفر په اصلي اجندا کې وي. آلمان اوس هم په اروپا کې د هندوستان تر ټولو لوی تجارتي شریک دی.

د «بیلډ» په نامه آلمانۍ ورځپاڼې د اړونده مقاماتو د یوې وړاند وینې په حواله لیکلي دي چې ښایي د اکتوبر له میاشتې څخه تر دسمبر میاشتې پورې نور ۹۲۰ زر کډوال آلمان ته راشي. د نوموړې ورځپاڼې د رپوټ له مخې له دې سره ښایي سږ کال آلمان ته د راتلونکو کډوالو شمیر تر یو نیم میلیون کسانو پورې ورسیږي. د آلمان فدرال حکومت تر اوسه په رسمي توگه سږ کال له ۸۰۰ زرو څخه تر یو میلیون مهاجرو د راتگ اټکل کاوه.

د ترکیې رییس جمهور رجب طیب اردوغان د دوشنبې په ورځ په بروکسل کې د اروپايي ټولنې له لوړپوړو چارواکو سره د کډوالو د کړکیچ په اړه خبرې اترې کوي. ترکیه د کډوالو د کړکیچ د حلولو په برخه کې مهم هیواد بلل کیږی ځکه له همدې لارې د سوریې او افغانستان ډیر شمیر وګړي ځانونه اروپا ته رسوی.

په پرتګال کې حاکم ایتلاف په ټاکنو کې خپله بریا اعلان کړې ده. د اپوزیسیون مشر هم د یکشبنې په ورځ خپله ماتې ومنله او د پرتګال د اوسني لومړي وزیر پیدرو پاسوس ته یې د هغه د بریا له کبله مبارکي وویله. پاسوس ویلی دي چې هغه به اوس د نوي حکومت د جوړولو له پاره کار پیل کړي.

د سوریې ولسمشر بشار الاسد په خپل هیواد کې د روسیې د هوایي بریدونو ملاتړ کړی دی. له یوه ایراني تلویزیون سره په مرکه کې، اسد ویلي دي چې دغه بریدونه باید بریالي شي، که نه نو د هغه په خبره ټوله سیمه له ګواښ سره مخامخمیدای شي. روسیې تیره اوونۍ په سوریه کې د «اسلامي دولت» نومې ترهګرې ډلې پر ضد هوایي بریدونه پیل کړل.

د کشمیر په غرنی او ناآرامه یسیمه کې د پاکستان او هند پر پوله، درې هندي سرتیري وژل شوي دي. د هندوستان د پوځ یوه ویاند د دوشنبې په ورځ د فرانسې خبري آژانس ته ویلي دي چې د دغو سرتیرو مړي په ځنګلونو کې هغه وخت وموندل شول چې هندي پوځیان د یاغیانو په لټه کې وو. ویل کیږي چې دغه سرتیري کیدای شي تیره شپه د یاغیانو له خوا وژل شوي وي.