ټاکنې دویم پړاو ته غځیږي
۱۳۹۳ اردیبهشت ۶, شنبه
د ټاکنو د خپلواک کمېسیون مشر احمد یوسف نورستاني، د شنبې په ورځ د ولسمشریزو ټاکنو لومړنۍ پایلې اعلان کړې. د دغو پایلو له مخې عبدالله عبدالله د ۴۴.۹سلنهرایو په تر لاسه کولو سره په لومړي او اشرف غني احمدزی د ۳۱.۵سلنهرایو په ترلاسه کولو سره په دویم مقام کې دی.
تر دغو دوو مخکښو کانديدانو وروسته په ترتیب سره زلمي رسول د ۱۱.۵، عبدالرب رسول سیاف د ۷.۱، قطب الدین هلال د۲،۷، گل اغا شیرزی د ۱.۶، داوود سلطان زوی د ۰.۵، او هدایت امین ارسلا د ۰.۲سلنه رایو په تر لاسه کولو سره له دریمه تر اتمه پورې ځایونه خپل کړي د ي.
ښاغلي نورستاني روښانه کړه چې دویم پړاو ته د ټاکنو د غځیدو امکان ډیر دی. هغه وویل: «زموږ د څیړنو پر اساس داسې ښکاري چې دغه ټاکنې دویم پړاو ته ځي.» خو نورستاني ټینگار وکړ چې په دې اړه وروستۍ پریکړه یوازې د ټاکنیزو شکایتونو د خپلواک کمیسیون له خوا د ټولو شکایتونو تر څیړل کیدو وروسته کیدای شي.
د افغانستان د ټاکنو د خپلواک کمیسیون چارواکو ډاډ ورکړ چې که ټاکنې دویم پړاو ته وغځیږي هغوی ورته له تخنیکي او مالي لحاظه چمتوالی لري.
تر دې وروسته به د ټاکنو خپلواک کمېسیون د می میاشتي پر۱۴نیټه د ټاکنو وروستۍ پایلي اعلان کړي. که هیڅ نوماند د پنځوس جمع يو سلنه رايو په گټلو و نه توانیږي، ټاکني به دویم پړاو ته وغځیږي. په دې ترتیب سره به د می میاشتي پر ۲۸نېټه د ټاکنو دویم پړاو ترسره شي. په ۲۰۰۹کال کې د ولسمشریزو ټاکنو پایلي د درغلیو د تورونو له کبله څو اوونۍ وروسته اعلان شوې.
په ټاکنو کې د ښځو زیاته ونډه
د افغانستان په ولسمشریزو ټاکنو کې د انتظارونو خلاف، کابو اووه میلیونو افغانانو گډون وکړ. که څه هم د افغان حکومت وسله والو مخالفینو گواښ کړی وو چې پر ټاکنیزو مرکزونو باندې به بریدونه وکړي، خو بیا هم د ټاکنو د خپلواک کمیسیون مشر وویل چې د اپریل میاشتې د پنځمې نیټې د ټاکنو په گډونوالو کې ۶۴ سلنه نارینه او ۳۶ سلنه ښځینه رای ورکوونکې شاملې وې.
منصرفو نوماندانو ته رایې
د ټاکنو د خپلواک کمیسیون مشر محمد یوسف نورستاني وویل چې ټول ټال ۲۳۴۶۴۷ رایې د بیلابیلو لاملونو له کبله باطلې اعلان شوې دي چې په ډله کې یې څه د پاڅه ۴۰۰۰۰ هغه رایې هم شاملې دي چې منصرفو نوماندانو ته ورکړل شوي دي.
د افغانستان په ولسمشریزو ټاکنو کې په لومړي سر کې ۱۱ کسانو ځانونه کاندید کړي ول، خو د ټاکنو تر پیل څخه مخکې درې تنه د نورو نوماندانو په گټه له خپلې کاندیداتورۍ تیر شول.