لندن کي د افغانستان په اړه درې اړخيزه خبري
۱۳۹۱ بهمن ۱۵, یکشنبه
ټاکل سوې ده چي د بريتانيا لومړی وزير به د يکشنبې په ورځ (۲۰۱۳ کال د جنورۍ ۱۳) ماښام په لندن کي له حامد کرزي او آصف علي زرداري سره وگوري.
کامرون به د دوشنبې په ورځ د دواړو هيوادونو له مشرانو او نورو لوړپوړو چارواکو سره، له افغانستان څخه د بهرنيو ځواکونو تر وتلو وروسته د طالبانو د بيا راتگ د مخنيوي په اړه خبري اتري وکړي.
د بريتانيا د لومړي وزير د دفتر يوه وياند ويلي دي: «دغه خبري اتري د هغه روانو تلاښونو يوه برخه ده چي د افغانستان- پاکستان د اړيکو د تقويې او په افغانستان کي د سولي او پخلايني او سيمي د امنيت له پاره ترسره کيږي.»
د لومړي وزير د دفتر دغه وياند دغه راز زياته کړه: «د لومړي وار له پاره موږ د دواړو هيوادونو سياسي او امنيتي چارواکي د بهرنيو چارو د وزيرانو، لوی درستيزانو، استخباراتي رئيسانو او د افغانستان د سولي د عالي شورا استازي سره راټول کړي دي.»
د دغه وياند په خبره: «تمه کيږي چي د افغانستان د سولي د پروسې په اړه خبري اتري او په هغه کي د پاکستان او نړيوالي ټولني پر نقش باندي خبري وسي. موږ دغه راز تمه لرو چي افغانان او پاکستانيان د هغي ستراتيژيکي همکارۍ له مخي چي د تيرکال د سپتمبر په مياشت کي لاسليک سوه خپلي همکارۍ نوري هم پياوړي کړي.»
افغان ولسمشر حامد کرزی د شبنې په ورځ په يوه درې ورځني سفر لندن ته تللی دئ. هغه به په دغه سفر کي د بريتانيا له شازاده چارلز سره هم وگوري.
د افغانستان د جمهوري رياست له خوا په يوه خپره سوې بيانيه کي راغلي دي: «په دغه ليدنه کتنه کي به د افغانستان د سولي د بهير د گړندي گولو او له تروريزم سره پر گډي مبارزې باندي خبري متمرکزه وي.»
د پاکستان د جمهوري رياست يوه وياند هم ويلي دي، چي آصف علي زرداري مخکي له مخکي په لندن کي وو.
دا په داسي حال کي چي د بريتانيا لومړي وزير د تير کال د دسمبر په مياشت کي اعلان وکړ چي دغه هيواد به په ۲۰۱۳ کال کي له ۳۸۰۰ څخه تر ۹۰۰۰ پوري خپل ځواکونه له افغانستان څخه راوباسي.
د دوشنبې د ورځي غونډه به له تير کال راهيسي دريمه درې اړخيزه غونډه وي. دوې تيري غونډي د تيرکال په جولای مياشت کي په کابل او په سپتمبر مياشت په نيويارک کي ترسره سوي وې.
د بريتانيا د لومړي وزير دفتر دغه راز ويلي دي :«دغه غونډه طالبانو ته يو روښانه پيغام رسوي، چي اوس د افغانستان په سياسي بهير کي د ونډي اخيستو وخت دئ.»
د کامرون دفتر دغه راز ويلي دي: «لکه څرنگه چي لومړي وزير مخکي روښانه کړې ده، يو باثباته افغانستان نه يوازي د افغانانو، بلکي د سيمي او برتيانيا په گټه دئ.»