ميرکل: اقليمي سياست امنيتي سياست دی
۱۳۹۰ تیر ۱۳, دوشنبه
د دغي غوڼدي مشره وينا کونکې د آلمان صدراعظمه انګلا ميرکل وه. هغې په خپله وينا کي نړيوال اقليمي سياست نړيوال امينتي سياست وګاڼه او ويې ويل، چي هغه به د ملګرو ملتو د امنيت په شورا کي دا موضوع عنوان کړي چي د اقليمي بدلون سره کوم خطرونه نړيوال ژوند ته متوجه دي.
ميرکل په دغه غوڼده کي چي د پيترزبرګ د دوهم ديالوګ په نامه ياديږي د نړيوال اقليم استازو ته په خپله وينا کي، د هغه نړيوال تړون د لاس ليک کيدو غوښټنه وکړه چي په نتيجه کي يې د نړۍ صنعتي او غير صنعتي هيوادونه د کاربن دای اکسايد د دوړولو په مخنيوي کي مکلف سي، ترڅو د نړيوالۍ تودوخي کچه له دوو درجو راکښته سي.
د کيوتو په نامه د اقليم اوسنی نړيوال تړون د 2012 کال په پای کي خپل رسميت له لاسه ورکوی، په همدې وجه نړيوالي هڅي رواني دي، چي په جنوبي افريقا کي د راتلونکي اقليمي سرمشرييزي له پاره د يو نوي تړون بندو بست وسي.
د کيوتو په تړون کي امريکا متحده ايالات، چي په نړيوال اقليم کي د سترو«مجرمينو» په جمله کي حسابيږي، ګډون نه لري.
د آلمان صدراعظمي په برلين کي د اقليمي چارو وزيرانو او استازو ته د خپلي وينا په دوام کي وويل چي، د نړيوال اقليم ساتنه او پالنه د نړۍ د ټولو هيوادونو مسؤليت دی او بايد په کمه سترګه ورته ونه کتل سي.
« خبره دا ده، کله چي د بهرنيو چارو وزيران چي ډيری يې د ملګرو ملتو د امنيت په شورا کي سره جرګه کوي پر دې موضوع باندي وږغيږي او د هغي پر اهميت ټينګار وکړي او تر دي ډير پام ور واړول سي، نو زما په نظر دا موضوع د سولي او امنيت له سياست سره تړاو پيدا کوي او دا خورا مهمه خبره ده.»
يپيسين/ عبدالباري حکيم
کتونکی: نجيب الله زيارمل