Kosova „lufton“ korrupsionin me korrupsion

Korrupsion nuk është vetëm dhënia dhe marrja e ryshfetit, sqaron Hasan Preteni, shef i Agjencisë Kosovare Antikorrupsion, sepse "çdo marrje apo dhënie ryshfeti me qëllim të shkeljes së ligjit është korrupsion, ndërsa mungesa e transparencës dhe e llogaridhënies, bazë për zhvillimin e tij. Përfitimi nuk është vetëm mateijal por edhe jomaterial. Krijimi i ndonjë favori, i ndonjë kushti apo rrethane të cilat pastaj rezultojnë me shkeljen e ligjit, janë korrupsion. Nuk ka njësi matëse për korrupsion, por tregues i qartë është pasurimi i zyrtarëve brenda nate."

Mjekët në Kosovë pasurohen në kurriz të pacientëve

Sipas Hasan Pretenit forma më e shfaqur e korrupsionit në Kosovë është aty "ku zyrtarë të pandërgjegjshëm krijojnë monopol në marrjen e vendimeve për shpenzimin e parave publike, pa transparencë dhe llogaridhënie" dhe i përhapur në përmasa alarmuese është në rastet kur ndahen buxhetet e mëdha.

Por korrupsioni është i shtrirë edhe në institucione të tilla siç është shëndetësia, sikurse dëshmojnë rrëfimet e Curr Mazrekajt dhe Avdyl Lokajt që u është dashur t'u paguajnë ryshfet mjekëve për shërbimin mjekësor.

Arrestime me pompozitet - Lirime si të pafajshëm

Edhe pse ka lëvizje në parandalimin e korrupsionit, Petreni ngre dyshimin se ka korrupsion brenda luftës kundër korrupsionit: "Ka të arrestuar, ka ngritje aktakuzash, mirëpo nuk ka gjykime. Me pompozitet arrestohen me një luftë pa dinjitet me kamera para publikut e familjes, për t´i liruar më vonë si të pafajshëm. Këtu duhet një analizë e mirëfilltë, si ndodhi me ato pak raste të sivjetshme ku asnjëri prej të tyre nuk përfundoi me gjykim, apo ndoshta në vetë luftën kundër korrupsionit ka korrupsion?"

Që nga themelimi i Agjencisë Kosovare Antikorrupsion janë ngritur 214 kallëzime penale në të cilat janë të perfshirë 700 zyrtarë.