Pas heqjes së vizave: Procedura të përshpejtuara për raste azilkërkuesish nga Shqipëria e Bosnja

Heqja e vizave për Serbinë e Maqedoninë solli një fluks azilkërkuesish në BE, vetëm Gjermania u ndesh brenda pak muajsh me 9000 shtetas nga këto dy vende, shumica romë. Për Bosnjën dhe Shqipërinë tashmë janë marrë masat, thotë në një intervistë ekskluzive për Deutsche Wellen Ursula Graeffin Praschma.

DW: Zonja Praschma, në muajt e fundit ka pasur një fluks të madh azilkërkuesish nga Serbia dhe Maqedonia në Gjermani. Nga cilat etni vinin ata?

Praschma: Është e vërtetë. Vetëm nga shtatori e këtej ka pasur shumë azilkërkues nga Serbia dhe Maqedonia, konkretisht nga Serbia 5800 ndërsa nga Maqedonia 3300, pra gjithsej 9100 persona. 80 përqind e tyre janë romë.

DW: Cilat ishin argumentet e tyre për kërkesën e azilit?

Praschma: Ata thonë që diskriminim në vendet e tyre, sidomos në sektorin e asistencës sociale, në shëndetësi, thonë se janë sulmuar nga policia, se ka pasur edhe përdhunime e traumatizime apo se janë të sëmurë e nuk mund të kurohen dot në vendet e tyre.

DW: Si i trajtuat ju ata?

Praschma: Rastet nga Serbia e Maqedonia i trajtuam në procedurë të përshpejtuar. Pra procedurat e tyre përfunduan vetëm brenda pak ditësh. Shanset që ata të marrin mbrojtje nga shteti gjerman janë shumë të ulëta. Zyra e Migracionit është mjaft e informuar për situatën e romëve në Serbi dhe Maqedoni. Është e vërtetë që ata diskriminohen, por kjo nuk mjafton. Rreth 80 për qind e kërkesave janë refuzuar. Ndërkohë kanë arritur edhe shumë vendime gjykatash që e kanë konfirmuar vendimin tonë.

DW: Sa i ka kushtuar ky fluks refugjatësh shtetit gjerman?

Praschma: Nuk i kemi llogaritur shpenzimet më vete, sepse ky zhvillim ishte shumë i ri për ne. Por duhet thënë se tek kostot nuk hyjnë vetëm ato të strehimit dhe ushqimit. Janë edhe kostot e proceseve gjyqësore që duhet të merren parasysh, e ku ne duhet të dërgojmë punonjësit tanë. Por edhe kthimi kushton, qoftë ky në mënyrë vullnetare, qoftë i detyruar. Në fillim ne kemi paguar edhe ndihma për ata që ktheheshin vullnetarisht. Kjo ishte 400 Euro për të rriturit, nga 200 Euro për fëmijët, si dhe nga 50 Euro për udhëtim për kokë. Nga kjo përfituan sidomos afro 300 shtetas serbë dhe disa nga Maqedonia. Por që nga tetori e këtej, këto para nuk jepen më për ata që kanë ardhur në Gjermani mbas heqjes së regjimit të vizave.

DW: A jeni përgatitur në rast se do të keni sërish një fluks refugjatësh nga Shqipëria apo Bosnja?

Praschma: Ne i kemi marrë masat për këtë. Jemi informuar hollësisht për situatën në Bosnjë dhe Shqipëri, sidomos për gjendjen e romëve dhe i kemi furnizuar filialet tona me materialin e nevojshëm. Ashtu si në rastin e Serbisë dhe Maqedonisë kemi vendosur që këta t'i trajtojmë në procedurë të përshpejtuar. Kjo do të thotë që kërkesat e tyre do të përfundojnë brenda disa ditësh. Shanset për të fituar të drejtën e azilit nga këto vende janë shumë të ulëta. Gjatë këtij viti nga Bosnja janë pranuar vetëm 7 nga gjithsej 264 azilkërkues, ndërsa nga Shqipëria janë pranuar vetëm tre nga gjithsej 42. Por këta nuk kanë qenë romë.

DW: Cilat dëshmi kërkoni ju për të vërtetuar nevojën për mbrojtje?

Praschma: Ne kërkojmë që shkaqet e azilit të paraqiten të logjikshme dhe me fakte të verifikueshme. Kur dikush thotë që ka demonstruar në vendin e tij dhe më pas është arrestuar, atëherë sigurisht që ne jemi në gjendje të kontrollojmë se a ka ndodhur një demonstratë e tillë në atë datë dhe a ka pasur të arrestuar. Për këtë ne konsultohemi edhe me Ministrinë e Jashtme, e cila i konfirmon këto ngjarje në terren.

DW: Si veproni ju me ata njerëz që paraqesin një identitet të rremë?

Praschma: Ne jemi në dijeni për njerëz që përpiqen të marrin dokumentat në Kosovë në mënyrë që të prezantohen këtu sikur janë nga Kosova. Ata mund të jenë shqiptarë, maqedonas, apo të tjerë. Por ne me Kosovën kemi një përvojë shumë të gjatë që nga vitet 80-të e 90-të dhe jemi shumë të sensibilizuar për këtë çështje, kështu që e kuptojmë menjëherë kur dikush nuk thotë të vërtetën.



Autor: Anila Shuka

Redaktoi: Lindita Arapi