051011 Italien Reaktionen
6 Tetor 2011
Moody's i jep Italisë vlerësimin "A2". Kështu ekonomia e tretë më e madhe në zonën e euros, Italia vend i G8, gëzon po aq kredibilitet për kredi sa Malta. Më keq janë vetëm shtetet problematike Irlanda, Portugalia dhe Greqia. Dhe e ardhmja mbetet negative për Italinë. Po të flasin në zhargonin e futbollit, Italia rrezikohet fuqishimisht të bjerë nga kategoria.
Vlerësimi negativ i Moody's nuk ishte surprizë
Franco Bruni, profesor i ekonomisë në Universitetin Bocconi të Milanos: "Arsyetimi i Moody's është i përsosur, ne e kemi pritur atë, edhe pse ndoshta jo kaq herët dhe jo kaq të fortë: më shumë dy shkallë më poshtë e jo tre. Këtë zhvleftësim e kanë përshpejtuar një numër çështjesh, përfshi edhe vështirësitë e Evropës për shpëtimin e Greqisë"
Edhe qeveria italiane e kishte pritur degradimin nga Moody's dhe u përgjigj pas botimit të analizës me një deklaratë me shkrim të kryeministrit, deklaratë e cila qe e ftohtë. Sinjali: gjithçka në rregull. "Ne jemi duke vazhduar punën për të arritur qëllimet e sanksionuara në buxhetin e Komisionit Evropian," tha Silvio Berluskoni. Të martën Ministri i Financave Xhulio Tremonti kishte qetësuar kolegët e tij evropianë me fjalët:
"Për ne ishte e rëndësishme që buxheti të jetë në rregull. Me paketën e kursimit, ne kemi siguruar që buxheti të jetë i balancuar, edhe në qoftë se nuk ka rritje ekonomike. Këtë na e ka konfirmuar gjithashtu edhe FMN-ja. "
Besimi në koalicionin qeverisës drejt zeros
Të enjten (6.10.) qeveria do të këshillohet për masa të reja për të nxitur rritjen ekonomike. Por besimi në aftësinë e koalicionit për të vepruar tenton drejt zeros. Ministri i Financave Xhulio Tremonti foli madje këtë javë për zgjedhje të parakohshme, edhe pse më vonë tha se donte të bonte një shaka. Mes Berluskonit dhe Tremontit ka disa javë që ka mosmarrëveshje për kursin e qeverisë.
Edhe politikani i moderuar i opozitës,, kreu i partisë UDC të qendrës, Pier Ferdinando Casini kërkon tani zgjedhje të reja: "Këto janë orë dramatike, fantazmën e Greqisë e kemi përpara sysh dhe megjithatë ende ka një papërgjegjshmëri të pabesueshme ndër ata që besojnë se çdo gjë mund të vazhdojë si zakonisht. Politika është paralizuar tërësisht."
Fondi Monetar Ndërkombëtar e konfirmoi sot indirekt rivlerësimin e Italisë nga Moody's duke bërë një bilanc të ngjashëm dhe të këq: Në 20 vitet e fundit, Italia ka norma rritjeje zhgënjyese, sipas një raporti të FMN-së flitet për një bllokim reformave, për një sistem taksash të komplikuar dhe produktivitet pune të ulët.
Autor: Tilmann Klein Jung / Pandeli Pani
Redaktoi: E. Xhani