Prigoshini mohon përpjekjet për përmbysje

Udhëheqësi i grupit rus Wagner, Prigoshin, foli për herë të parë që nga rebelimi i trupës mercenare. Në një mesazh audio, Prigoschin mbrojti veprimin e tij të shtunën e kaluar. Qëllimi nuk ishte përmbysja e liderëve rusë, por rivendosja e drejtësisë, tha ai.

Më tej, ai akuzoi përsëri ushtrinë ruse se sulmoi njësitë Wagner me raketa dhe helikopterë. Prigoshini shtoi se përparimi i luftëtarëve të tij kishte nxjerrë në pah shqetësime serioze të sigurisë në Rusi.

Vendqendrimi është ende i paqartë

Disa mijëra luftëtarë nga trupa mercenare hynë në Rusi gjatë natës nga e premtja në të shtunë nga fronti në Ukrainë dhe përfundimisht arritën 200 kilometra në afërsi të Moskës, sipas të dhënave të Prigoshinit. Pas një marrëveshjeje të ndërmjetësuar nga udhëheqësi bjellorus Lukashenko, lideri trupës Wagner ndaloi rebelimin dhe tërhoqi luftëtarët e tij. Në këmbim, qeveria ruse e siguroi atë për mosndëshkim; Prigoshin gjithashtu duhet të jetë në gjendje të udhëtojë në Bjellorusi. Vendndodhja e tij aktuale nuk dihet.

Putini shfaqet sërish

Presidenti rus Putin gjithashtu u shfaq zyrtarisht për herë të parë që nga rebelimi i grupit mercenar Wagner. Në një video-mesazh, ai uroi pjesëmarrësit e një forumi industrial në Moskë. Megjithatë, nuk ishte e mundur të dihej se kur ishte bërë regjistrimi. Kremlini njoftoi gjithashtu se Putini ka folur sot në telefon me kreun e qeverisë iraniane Raisi. Ministri rus i Mbrojtjes Shoigu bëri gjithashtu një dalje të parë publike. Sipas agjencisë së lajmeve RIA, ai vizitoi trupat e përfshira në sulmin ndaj Ukrainës.Pas rebelimit të grupit Wagner, fillimisht nuk pati asnjë qëndrim nga Putini dhe Shoigu.

Biden: SHBA nuk kanë asnjë lidhje me këtë rast

Për herë të parë presidenti amerikan Biden foli edhe për ngjarjet në Rusi. Ai theksoi në Uashington se Shtetet e Bashkuara dhe aleatët e tyre nuk kishin asnjë lidhje me të. Kryengritja ishte pjesë e një lufte brenda sistemit rus. Përfaqësuesi i BE për Punët e Jashtme, Josep Borrell tha pas takimit të ministrave të jashtëm në Luksemburg se situata në Rusi po vëzhgohet nga afër. Ajo mbetet komplekse dhe e paparashikueshme.