عرب اور غیر ملکی افواج کے شام میں داخلے کا وقت آ گیا ہے، قطر

شام کے لیے اقوام متحدہ اور عرب لیگ کے خصوصی مندوب اور اقوام متحدہ کے سابق سیکرٹری جنرل کوفی عنان نے آج ہفتے کو دمشق میں شامی صدر بشار الاسد سے صدارتی محل میں ملاقات کی۔ وہ دیگر حکومتی اہلکاروں، سول سوسائٹی کے ارکان اور امدادی کارکنوں سے بھی ملے۔ شامی سرکاری ٹی وی کے مطابق صدر اسد اور عنان کے درمیان ملاقات ’مثبت‘ رہی ہے۔

قبل ازیں نیویارک میں اقوام متحدہ کے صدر دفاتر میں صحافیوں سے بات چیت میں اقوام متحدہ کے سیکرٹری جنرل بان کی مون نے کہا تھا کہ عنان شامی اپوزیشن کے رہنماؤں سے بھی ملاقاتیں کریں گے تاہم یہ ملاقاتیں بعد میں شام کے بجائے دوسرے ملکوں میں ہوں گی۔ انہوں نے بتایا کہ کوفی عنان اتوار تک شام میں قیام کریں گے، جس کے بعد وہ خطے کے دوسرے ملکوں کا دورہ کریں گے۔

کوفی عنان نے صدر اسد کی حکومت پر زور دیا کہ وہ تشدد کے خاتمے کے لیے امن معاہدے کی طرف بڑھیں۔ شام کے سرکاری ذرائع ابلاغ کے مطابق شامی صدر نے کوفی عنان کو یقین دلایا کہ شامی حکومت ایک ’سچے‘ معاہدے کو قبول کرنے کے لیے تیار ہے۔

اقوام متحدہ کے اعداد و شمار کے مطابق گزشتہ برس شروع ہونے والی اسد مخالف تحریک کے دوران اب تک کم از کم ساڑھے سات ہزار افراد ہلاک ہو چکے ہیں۔ ہلاکتوں کی تعداد میں روز بہ روز اضافہ ہو رہا ہے۔

دوسری جانب قطر کے وزیر خارجہ نے کہا ہے کہ شام میں عرب اور غیر ملکی افواج کے داخلے کا وقت آ گیا ہے۔ یہ بات قطر کے وزیر خارجہ نے قاہرہ میں عرب لیگ کے وزرائے خارجہ کے اجلاس میں کہی۔

قطر کے وزیر خارجہ نے شام کی حزب اختلاف کو تسلیم کرنے کی بھی بات کی۔ ساتھ ہی انہوں نے روس اور چین پر تنقید کرتے ہوئے کہا کہ سلامتی کونسل میں اسد حکومت کے خلاف قرارداد کو ویٹو کرنے سے شامی حکومت کی طرف ایک غلط پیغام گیا۔

روس پر صرف قطر کی جانب سے ہی تنقید نہیں کی گئی۔ سعودی عرب کے وزیر خارجہ سعود الفیصل نے بھی روس کی مذمت کرتے ہوئے کہا کہ روس کے ویٹو کی وجہ سے شام میں تشدد ابھی تک جاری ہے۔

روس کا کہنا ہے کہ شام میں تشدد کی ذمہ داری کسی ایک فریق پر نہیں ڈالی جا سکتی۔

ایک اور واقعے میں شامی باغیوں کی جانب سے یہ دعویٰ سامنے آیا ہے کہ اس نے سکیورٹی فورسز کے ایک ہیلی کاپٹر کو مار گرایا ہے۔

ہفتے کے روز باغیوں کے گڑھ ادلیب میں بارہ افراد کی ہلاکت کی اطلاع موصول ہوئی ہے۔

رپورٹ: شامل شمس ⁄ خبر رساں ادارے

ادارت: عصمت جبیں